  |
  
|
2-9-2007 行程結束 返香港
第十六天
時間過得真快，15天一晃就過，過埋今日16日的大旅行就完結了，學星爺話齋：開心時間特別快，又係時候講byebye。希望下年可再去一個16天的大旅行啦。再見西藏，再見拉薩，再見珠峰，再見納木措，嗚嗚~~後會有期(我真係想再去架)。到此，16天行式正正式式的完結，明天返工了。嗚嗚~~嗚嗚~~
貢嗄機場---全世界最高的機場
由早上10:30離開旅舍，返到香港，足足要11個小時。佢老友啊，我真係冇諗過返香港要11粒鐘。之前重笑班香港人去成都轉機膠，原來我地坐呢班先膠~~~
小弟的青藏行日誌到此都寫完了，多謝大家賞面點閱，希望可留個言支持下啦~~
有機會我會再寫XX行日誌的.....
1-9-2007 自由行第一天 拉薩市內-->拉薩博物館，布宮正門，八廓街
第十五天
其實今天先係行程的最後一天，因明天早上別完早餐，執埋行李就去機場了，完全無行程可言。本安排今天早上先到拉薩博物院逛逛，再去布宮門口影白天的布宮正門，下午再去八廓街買手信，但一件事打亂了計－就係小裕哥一起身就肚仔唔舒服，本來諗住食幾粒藥，忍一陣就無事，最後都係不掂，要去醫院check check，係醫院攪左一大輪，又驗呢樣又驗果樣，離開醫院去到新落腳地青年旅舍都成12點，小裕就自己係旅舍休息，我地三個繼續行程；先打的去到拉薩博物館，入場費要成30元，好貴，決定唔入，只係在大門口影下相算，之後去布宮正門影左d相，再行去八廓街買手信，都買左不少東西。最後最後，返旅舍搵埋小裕去好出名個間野「“瑪吉阿米”」食晚飯，我地係天台度食dinner，如果講feel，講情調，2樓會比較正，呢間野都叫做景點，食物質數一般，但點都要去下，食完後，又係八廓街磨左一陣，就回旅舍了。最後的活動，上旅舍天台架bar坐一陣，間野都幾別致，同埋有兩條狗同兩隻貓，每人飲左杯野後就返房，行程正式完結了。其實，如果肯花多D時間，搵多D資料，同埋去到西寧先搵車，整個行程每人可平4000元。當經驗吧~~
31-8-2007 日喀則-->扎什倫布寺-->藏香製造處-->大合桃樹-->拉薩火車站
第十四天
今天是旅行社安排行程的最後一天，會由日喀則返回拉薩及同司機分手，而我們還有兩天自由行行程，之後16天的行程就會結束。而今天也有一個景點的，是扎什倫布寺，扎什倫布寺是後藏最大的寺院，也是黃教六大寺院之一。扎什倫布寺亦是歷代班禪額爾德尼的駐錫地。可能之前真係行左好多寺，雖然呢間係係日月山撞到的香港人推介的，但我們也行寺行到悶，再行可能會嘔泡，所以冇行完整間寺就離開，現下想起也有些後悔。再看網上關於這寺的資料，沒有上到最高頂真是可惜（其實我地都行左成2粒鐘的）。
參觀完後，再開車往拉薩進發，吃完lunch後，往拉薩的途中，司機超速比交警罰左200元，好攪笑，係條冇列明速度限制的路上，你超速了，只有大陸才有；不過個2百元我地都比返司機的。在途上我地經過左2個地方， 藏香製造處and大合桃樹，行程無安排的，但司機都泊車比我地影下相(last day搏好感??)。藏香原來係條河度生產的，靠水流來推動D工具來製造藏香的，幾有趣；而個棵大合桃樹又係好大，係高地可以生到咁大咁高，都幾利害。影完相再開車，都差不多到拉薩了，重有些時間，司機車埋我地去拉薩火車站，醒埋比我地。個火車站比機場更靚，條路又大又闊又靚，而附近的街道又十分之新淨同先進，比八廓街及其附近更加先進同繁榮。聽司機講，每年中央都比過百億拉薩洗的。影完 拉薩火車站後司機車我地返酒店，之後我地比埋D小費比司機，正式同佢話別，但收小費時司機的樣子有少少不高興，佢比我地的好印象當堂無晒；小費要100X14 = 1400再加多我地額外比的600，total 2000，不滿意嗎?不過算了。最後司機車埋我地去八廓街就byebye了。
約左個4個香港人今晚一齊食dinner，可惜的是有一個女孩子肚仔唔舒服，沒有來。先去我地去過間藏餐餐廳試下藏餐，佢地3個想食，食左少少後，再去海天夜市（之前司機帶我地食羊肉的地方）食羊肉串，個店員都認得我，食的過程十分開心，氣氛好好，可能大家都係香港人掛，年紀又差不多，很好的一頓飯，不錯，最後約了回香港去均家bbq同睇相。就這樣，14天行程就此結束，只剩下明天和後天的自由行行程，依依不捨的心情又再泛起了。
30-8-2007 珠峰大本營-->日喀則
第十三天
今日的唯一節目系上珠穆朗瑪大本營，來了，終於都來了，珠峰我來了。
尋晚10點前就上床睡了，又凍又悶又落雨，夜晚唔瞓覺真係冇野好做，係5200米高的地方睡覺，我本來都諗住睡得不好，很難才能入睡(因之前係納木措撞到個阿太話，佢係珠峰完全瞓唔到)，哈!點不知ok wor，尋晚瞓得好好，由10點一路睡到5點幾，未醒過，但5點幾醒左後就瞓唔番。自從由納木措開姑，適應了高山氣候後，都瞓得唔錯。早上的珠峰天氣真的很差，黑蚊蚊的，由扎醒開始等到7點幾，個天都無好到，都係烏黑黑咁。最後忍到差不多8點，個天重係咁，但師傅話要出發上大本營了，無奈執埋行李上車。一出到觀景台，見到個天有少少少少光，但都重係黑，又加上好凍，心情都唔太好，都無計，唯有照去。
上珠峰大本營山腳都要“登”多10幾分鐘，去到山腳，見到兩旁有好多帳篷，係比D遊客租來睡的，一個床位50元左右，入過去參觀，都幾ok架。上大本營要坐環保馬車，我地分2架，第一次坐馬車，都幾特別啊；坐馬車上大本營，要差不多半小時，除左凍之外重有又係要“登”上山，個天而家光左少少，但個珠峰都係睇不到或睇到好少。終於上到大本營了，又係要登記，我重係今日第一個到大本營的遊客啊，感動。終於上到大本營了，但心情好平靜，未上到時就好興奮好期待，上到去又發覺無咩特別，其實除左佢係全地球最高的山脈外，其實都係一般的雪山。不過，心情依然係開心同興奮的，又在大本營個石碑前同比較高的地方影左一大輪相後，就坐環保馬車“登”番落山，攪下攪下都攪左成2粒鐘。係山腳買左2舊化石，之後就離開珠峰，坐車“登”番出定日食lunch。係出峰的途中，發生左件事，因路的問題，司機同另一個藏人司機嘈左2句，明眼人都睇得出係藏人司機太小氣，不過都無咩問題，但就更加不喜歡藏人。不過之後藏人司機架車係路上比D泥食住左架車，行唔到之餘重要等人救，唔知代表什麼呢？x人有x報????lunch又去番尋日個間食，食時又有D藏仔來賣代石，我無買，但而家有D後悔。食完後就開車返日喀則，今日無咩落車，影左好少相，6點幾終於返到日喀則。不知不覺，16日行程只剩下3天了，而明天就要同師傅道別了，由開頭幾天覺得有些悶想返香港到現在依依不舍。下星期又要正常地生活了，返工放工日覆日；這十幾天的行程，令我更加覺得，香港人／在香港生活的人真的十分幸福，大家要珍惜啊。本來不打算買手信比朋友同事，但而家諗諗下，去到拉薩後會到八廓街買d最平最cheap的小手信比佢地。
係返日喀則途中見到的西藏小孩
聽日去扎什倫佈寺~~最後一個行程~~~
